بعض المجالس

المجلس اللي فيه ترتاح الاوناس
يشتاق لك فيه الرفيق بحراره
يفز لك من مجلسه تقل قرناس
سمح الحجاج ودلته عند ناره
مجلس يباهي فيه خلاق الاجناس
كنك ظفرت المرجله بالجداره
بعض المجالس نشتريها بالألماس
وبعض المجالس نعتبرها خساره
غيبة وسب وكذب ومعاير الناس
ابليس ثبت في وسطهم شعاره
واليانصحته عبس بوجهك عباس
وقام يتطاير من عيونه شراره
ياعنك لوجاملت هالنوع تنداس
اللي يحسب ان المهايط شطاره
ما ينفع التلميح في بعض الاشخاص
لازم عليه نشن تسعين غاره
اللي عطاك السان وعيون واحساس
هو ماعطى عقلك شوية وقاره
واحسن لي اترك مجلس فيه الادناس
واطلع مراقيب الفخر والصداره
لا صار مالك مع هل النقص مجلاس
جنب عن اهل الناقصة والحقاره
والعز والله رفعة الدين للرأس
ماهوب زود الفخفخه والتجاره