الواجب اللي حج يفسح مجاله

لا اله إلا الله من قلب ولسان
افضل بداية خير وسم الجلاله
به نستعين ونلتجي كل الاحيان
المحي المفني كفلنا كفاله
سبحانه المعبود علام ما كان
يعلم خفيات السراير لحاله
بأمره تهب الريح وتهل الأمزان
من مدلهم بالمنا شي خياله
تفرح به العربان وتعيش الاوطان
الله وكبر وش ندور بداله
مع الامن والخير صحة بالابدان
تكميلته تطبيق حكم العداله
درع لنا عن كل ماكر وخوان
ناس يختلون الأوادم اختاله
انهيت لي موضوع بسلوب فنان
واليا وردت العد عندي حباله
هذي نصيحة خير والقلب شفقان
لاغلى نصيحة مار مابغى الاطاله
صلوا وصوموا وكملو خمس الاركان
والمسلم العاقل يزكي حلاله
ترى التهاون بالمواجيب نقصان
من استطاع الحج يكرب حباله
ويحج فرضه والفريضة لها شان
والحج ما به فسق والا ختاله
بطهر بقاع الارض وقول يا خوان
الواجب اللي حج يفسح مجاله
لاخوانه اللي جو من كل الاوطان
يدون فرض جا بنص الرساله
فرض على المسلم وللهرج برهان
كل يشد البيت ربي رحاله
والخاتمة صلوا على نسل عدنان
عداد وبل الغيث شرق وشماله