أضحك وقلبي بين الأضلاع يومي

اختيارات

أضحك وقلبي بين الأضلاع يومي
آوماي عود فيه ملواح صقّار
وكبدي عليها تقل لاهب سمومي
لا تقل يحضا فوقها الجمر بوجار
وليا فطن لي قلت كبدي تزومي
ركبت عليها من هالأيام الأمرار
يالله يا منشي ثقيل الغيومي
يا مرجعٍ بالرّيف من عقب الأدهار
يا عايدٍ عقب المحل بالوسومي
وبلٍ يخلي لاشهب القشع نوار
منك السعد يا عالم السردومي
يا عالم الأسرار يا كافي الأشرار
نويت أقوي العزم لأجل اللزومي
وأفارق أحبابي ودارٍ بدل دار
وقطع الفيافي والحزايم سلومي
وفي داجي الغربيب لي عزم وصطار
ما ني ولد هدر رديّ العزومي
يمسي ويصبح منخذل مّيت النار
بين العذارا جالسٍ تقل بومي
وأعوذ بالخلاّق عن كلمة العار
سويلم العلي رحمه الله