فقيد الأمة من تعدا بصيته

راح العزاء في سيدي ما رثيته
عجزت أصدق بالوداع ودواعيه
ستغفر اللي يعلم بما خَفيته
كنّي مكذّب بالمنايا توافيه
ورغم الدموع الحارقه لا بكيته
والحزن وإيماني برحمنٍ أرجيه
يا طعن قلبي عقب فرقاه ليته
عايش وأنا بالقبر روحي فداويه
جرحي عقب فقده لو إنّي كويته
يا سرع نقضه كل ما حلّ طاريه
فقيد الأمة من تعدا بصيته
كل الحدود الناهله من حسانيه
وحبيب شعبٍ بالولا حط بيته
داخل عيونه والمحاني تذرّيه
أبوي وأبو متعب عساه بمبيته
بين النصايب شامله عفو واليه
وأسألك يا من في سجودي دعيته
في عالي الفردوس تجعل مراسيه
وتجبر (خفوقي) يوم قمت ونعيته
من بعد ما (استيقن) بترحال غاليه
وقصيدي اللي لا بغيته لقيته
وقامت تجر لحون حزني قوافيه
يا من محبّه في أبو متعب قريته
لا تنتسيه من الدعا دام تغليه
شعر - حصة العتيبية