أبو الوطن من كل عج ومعاصير

استصغر الكلمة وألوم التعابير
واكتب وأعيد اشطب جميع الكتابه
والدمع من عيني تهامل محادير
والقلب زود الحزن.. بالهم صابه
يوم أعلن الديوان بالعلم ما غير
أصفق بكفٍ كف .. حزن وكآبه
رحل حبيب الشعب زبن المخاسير
من دونهم لله.. ما صك.. بابه
ابو اليتامى والارامل من الضير
وأبو الفقير .. اللي حياته رتابه
وأبو الشهيد اللي ترك له مصاغير
من شان حب الدار يحمي ترابه
وأبو الوطن من كل عج ومعاصير
لاقام راع الشر.. يحشد حرابه
سياسيٍ محنك ومقدام للخير
والا لراع الشر.. ما هوب يأبه
للعلم تنشأ جامعه دون تاخير
والطب قامت له.. مرافق تشابه
وركب التطور فالبد يسرع السير
شمل جمع الشعب شيب وشبابه
والدار دونه حاشدين الطوابير
بجيشٍ سعودي ما خلق له مجابه
الله يرحم (ابو متعب) وله خير
وفيك يا (سلمان) .. طيب وحبابه
لاشفت من بايعك بكثر الطوابير
ادركت حب الشعب ماله مشابه
محمد بن نايف بن بنيان العتيبي