جيت المكان اللّي بوَسْطه تربّيت

صور شاعرية

جيت المكان اللّي بوَسْطه تربّيت
بيتٍ قديم مْأَسِّسِيْنه من الطين
بأطْراف ذاك البيت بالفكر سَجّيت
ذِكرت وقتٍ مضى لِي من سْنِين
قمت انثر العبرة من الدمع هَلّيت
ضيقه بصدري رافقت دمعة العين
تبقى بك الذكرى ولو رحت وأقفيت
أبكي على الأطلال لو ما بقى شين
باقي بك أشْيا ذكّزتني وحّنيت
الزّير وفرَاشي وبعض المواعين
وأذكر سراجٍ كان يضوي لنا البيت
على سنا ضّوّه نِلِف الميادين
ياكم ليله عشت فيكُ وْتَهنّيت
ياكم مضى لي بك من العسر واللّين
شعر / منيرة الثابتي