يابوي

ليت العرب يابوي فيهم سجاياك
وليت العرب يابوي شافوا فعولك
كان اعتدل حال تردى بلياك
أقولها وأنا تربيت حولك
يابوي ياعز الشرف لاعدمناك
زال الكدر والضيق حزة وصولك
يجوز لي فعلك وهرجك وممشاك
ولاخاب ظن اللي نصوك وعنولك
بالطيّبة محد سبقك وتعداك
افعالنا مهما رقت ما تطولك
علمتنا وشلون نرقى للأفلاك
وميزتنا عن غيرنا وشهدولك
يابوي انا سيفك وكيفك ومركاك
وعن الهرم شوفك وأنا لك رجولك
وانا لك اليمنى ليا احتجت يمناك
والله يقدرني واخفف حمولك
عسى الولي يحفظك ويسدد خطاك
ويسعدك بالدارين واللي دعولك
والله يقدرني بالإحسان وأجزاك
والله ينولني رضاك وقبولك