صباح الخير

تنبه يا صغير لا تحسب أن الحياة حلوم
كلام الناس ما يرحم هواك وجرحك الدامي
صباح الخير يا غافل عن الدنيا وصح النوم
زمانك غير أوهامك وحظك طاح قدامي
انا مالي سوى دفتر غرام وصفحتين هموم
قصيد لا كتبته يا صغير حرك الهامي
تعلم وافتهم وافهم حياتك والحياة علوم
احدٍ لا طاح طاح وقام وأحدٍ طاح ما قامي
أحدٍ يبني حياته بالظلام ويا حياة البوم
يهاب النور ويحب الظلام المدمس العامي
واحدٍ يبني حياته بالنهار ولا يهاب اليوم
فهم نفسه صدق حدسه عصامي والهدف سامي
واحدٍ يمشي ولا يدري يمينه من يسار القوم
وقف مذهول بين الناس لا شرقي ولا شامي
عيون تنام وعيون سهيره ما تعرف النوم
ولاهي مشكلة ما دام قلبك حي ما نامي
ولا منك لقيت البنت تطغى والرجال رخوم
على الدنيا السلام وزايله والناس باحلامي
ولامنك لقيت الراي يوخذ من سفاه القوم
ترفع واجفهم يا عل ما يبقى لهم نامي
وإلى حدك زمانك وأنت لا حاكم ولا محكوم
يقولون العرب دق الحديد ومعدنه حامي
وطيت الداب يوم اني وطيته ما عليّه لوم
وانا لو هو بكيفي ما وطيت الداب باقدامي
وقفت بوجه عسرات الليالي والعتب والشوم
وحطت بي مواري بينه لاشلت هندامي
ومشيت بسكة الماشين لافايز ولا مهزوم
اداير حيلتي يوم وراي ويوم قدامي
وعرفت ان الحياة اللي نعيش ابها سما وغيوم
تقلب بين شر وخير مثل اضغاث الأحلامي
وعرفت ان السعيد اللي حياته بين حج وصوم
موحد في صلاته في زكاته مال الايتامي
وإلى مني دعيت ونيتي بيضاء كما اليشموم
اقول الله يحييني بخير ويحسن إسلامي