على حد الشفق

أشوف الشمس تنسج لي على حد الشفق ذكراك
وصوت الموج زوّدها عليّ وكثر عتابه
وأنا ساهي مع الضيقه اسولف للشقاء فرقاك
على طاري الغروب اللي يسر الحزن بغيابه
سرحت بمنظر اللوعة تبعته وانتهى بي هناك
هناك بشاطي الحسرة رسا بي عند أغرابه
سحرني بروعته واثره يحايدني على مجراك
مثل ذاك الكذوب اللي تبعته لين أبوابه
تبعته واثرني جيتك وانا اللي ما هقيت القاك
على جال الشعور المنجرف في ساقة إعجابه
اخذني للأسى حسبي عليه الله يوم اطراك
أثاري خافقي هاجس شقاه بنظرة اهدابه
أثر ماكل شي ينفعك لو أعجبك واغراك
وذا أكبر دليل إعجابي اللي ضعت باسبابه
وانا ما نيب ناكر عشرتك يوم اعتمد وانساك
ولابه عاشقٍ مغرم يعاف الوصل لاحبابه
ولكن الظروف القاسية عن وصلنا تنهاك
فمان الله واعذرني على الإجحاف وارهابه
عتقت الدمع بفراقك وانا مجبور يوم اجفاك
ولكن البحر أقدى وجار الموج بعتابه
وانا لو أدري أني بفقدك عند البحر والقاك
قسم بالله ما فكر اجيه ولا اقرب ترابه