البارحة عيني جفت لذة النوم
جاها خبر كدّر عليها المنامي
ما لومها لو تذرف الدمع ما لوم
تبكي على شيخٍ كريمٍ همامي
صفقت بالكفين والقلب مكلوم
راح الامير اللي عليه الكلامي
راح الذي بابه مشرع على الدوم
عدٍ يصدر كل من جاه ضامي
مرحوم يا شيخٍ رحل تالي الصوم
سعد ولد خالد رفيع المقامي
مرحوم يا فزعة دخيل ومضيوم
عساه في الجنة سلام بسلامي
مرحوم يا ملفي للأصحاب والقوم
له سفرة يشبع بها كل رامي
أبكيك أنا ذا الليل والصبح واليوم
ويبكونك الشيخان وأم الغلامي
ويبكيك عود طاح ما يقدر يقوم
ولا له عضيد كود ولد خمامي
ويبكيك ذيدان عليها الشحم كوم
ذودٍ مغاتير وذودٍ جهامي
ما مات من ورَّث طحاطيح وقروم
خمسة شيوخ مثل حد الحسامي
لا ثارت الهيجا مثل دولة الروم
وسيوفهم تقطع صليب العظامي
وصلاة ربي عد من حج ويصوم
على شفيع الخلق يوم الزحامي