دمعة ملك..لدت لها كل الأنظار

سميت بسم المفني النافع الضار
ربّ يدبّر ما يشاه ويريده
بامره تهب الريح وتهل الامطار
ينهى ويامرنا وحنا عبيده
الله اكبر والليالي لها أطوار
مار اغتنام الوقت فرصة سعيده
في طاعة الوالي وفي كثر الأذكار
زادٍ من التقوى وحجة وكيده
شبراً من الجنة يبّعد عن النار
وانا مواعد هاجسي في وعيده
وشرعت بايبات المعاني والاشعار
واهديت من بنك الطرايف قصيده
للعاهل المقدام والوالد البار
زيزومنا وقت الليالي الشديده
حاكم حكيم ابعيد نظره وبيطار
كان الحديدة طق راس الحديده
معروف أبومتعب كما ضلع سنجار
مواقفه وقت اللوازم عديده
ونظرات عطفه كنها الغيث مدرار
ردة على المشتان روح جديده
بالماقف المشهود والناس حضار
اعلن بها التلفاز قبل الجريده
دمعة ملك لدت لها كل الأنظار
فيها ومنها العطف دمعة فريده
اتجسد ارموز المحبة بالافكار
وتصير للموضوع جملة مفيده
حب ولاء وعلوم كلها اخيار
الشعب مخلص والحكومة رشيده
من فضل رب البيت علام الاسرار
نظرات ابو متعب تراها بعيده
توقيف حفلات الاغاني له اثمار
يدريبها اللي له ضمير وعقيده
والخاتمة عداد همال الامطار
واعداد ما خط القلم بالجريده
الله يقطع دابر الناس الاشرار
ومن فيه خير الله كريم ويزيده