زيزومنا حام الحمى

ابدي بذكر المعتلي وال الأقدار
اللي خلق خلقه بخلقه رحيمي
علاَّم مكنون الضماير وما صار
وبالمقبلات من الليالي عليمي
ستَّار يا غفَّار للكسر جبَّار
فردٍ صمد ما له شريكٍ عظيمي
نسألك باسمك يا الولي سر وجهار
بقدرتك يا مجري هبوب النسيمي
تحمي مليك العرب من كل الأخطار
يعود أبومتعب لشعبه سليمي
اللي على شعبه كما الغيث مدرار
والخير بالدار العزيزه عميمي
الكل مشتاق لشوفه على نار
حتى الصغير اللي بسن الفطيمي
زال العنا والطير غرَّد بالأشجار
بشفا زعيم الدار واكبر زعيمي
زيزومنا حام الحمى صلب الاشوار
ساس الوفاء سيفٍ بتوعٍ صريمي
يستاهل التمجيد والمدح والكار
يطيب بالضرغام بدع النظيمي
منصى الضعيف اللي عليه الدهر جار
عزام جزامٍ هميمٍ حكيمي
حرٍ ولد حرٍ ومن مَاكَرْ احرار
اللي حموها من زمانٍ قديمي
عزَّ الوطن ومناصر الدين والجار
والا على العدوان نارٍ جحيمي
حماية الساقه وهم عزوة الدار
إن جا نهارٍ صار بالجو غيمي
بالسيف سادوها على سرد الأمهار
نصر من المولى وربك كريمي