يطري عليه مع هبوب الشمالي

يفز قلبي كل ما هبت النود
يفز لا هبت هبوب الشمالي
يضوي بها نفح (ن) من الورد والعود
وتجدد بقلبي قديم الأمالي
ويحيا شعور (ن) داخل القلب موجود
حب (ن) كبر ما بددته الليالي
حب (ن) مع الأيام يكبر بلا حدود
حب الهنوف أم الدلع والدلالي
أم العيون الناعسه والهدب سود
سبحان من سواه رب الجلالي
اللي وجونه بالحلا تشبه ورود
غروب شمس (ن) دونها المزن حالي
صديت لكن ما نفع بُعد وصدود
وده تمكن بي خفيف الظلالي
موجود لكن شبه ماني بموجود
وسط البشر وتقول جالس لحالي
بذلت مجهود (ن) ما هو بأي مجهود
لجل إني أدله عنه ويزين حالي
لكن سكن في خافقي لين العود
وبنا كيان (ن) كبر شم الجبالي
عذروبه إن الوصل بيديه محدود
ومحدود وصله ما عطاني مجالي
وعذروبي إني كل ما هبت النود
يطري عليه مع هبوب الشمالي