شمالي نجد

بصمة

غنيت من غربة فكر، مدري فؤاد
وانا سكوتي طال من قبل النوى
من قبل عامين المواجع والبعاد
البال - يا عبدالعزيز - وما حوى
قل مثل ليل السيل، قل صبح الهجاد
راعيه لو هو من ورا الصمت انزوى
يدرك مدى من يدرك العلم الوكاد
مثلك.. ومثلك ما يدانيه الخوا
رحب الفكر، خصب المعارف والوداد
عداك هم اللي مع اشواقه ضوى
للديرة اللي زادت البعد افتقاد
جيت ومعي قلبي.. ولكن ما قوى
يبقى معي لأهل التسالي والحياد
وعرفت من ليل الرياض إن الدوا
صبا شمالي نجد.. والذكرى نكاد
ما ودعتني قرة (عيون الجوا)
ولا تركت (الرس) خلان ومعاد
واطول ليال العمر لو عدن سوى
عن ليلة تستوفي العمر السهاد
صفا سماها.. واشرق النجم وهوى
في غيهب ما بين طرفي والرقاد
تشبه سهر من باتها على الطوى
يمكن يطول سهيل ما طال المراد
رويت لك عن دفتره فيما روى
عن غربته، غربة فكر، غربة فؤاد
محمد صلاح الحربي