ساحة عكاظ

وش يفيد البوح والواقع أصم
والتعب ليلٍ غشى صبح البياض
ما بكيت الشمس إلا من عتم
ما خسرت من الرضا إلا اعتراض
الأمل حدّر على صدر الألم
والمدامع سيل والوجنة رياض
والدروب طوال متعبة القدم
والوله غيض على الأوراق فاض
يا رفيق الحرف وش فود القلم
لو نبيع الحرف في ساحة عكاظ
انت تشكي وأنا أشكي للوهم
والحروف الشوق يرسمها وهاض
ما ندمنا بس يذبحنا الندم
ما شكينا بس داخلنا اغتياظ
الخفوق بساحة الموت انهزم
كم حربٍ في شباب النبض خاض
لا هو اللي فاز من ثمٍ غنم
ولا هو اللي عاد لي خالي الوفاض
كل بوحٍ فارق الصمت انكتم
كل صبحٍ زارني ما به بياض