وين الصديق!

الوقت يا اهل العرف زادت ظروفه
والناس شانت والليالي والايام
عجزت لا القى من يشرف وقوفه
عند الشدايد للخوي درع وحزام
قلبه نظيف وفيه عطف ومروفه
ولا يهتني بالنوم لا صرت منضام
يهتم من همي بنفسٍ عطوفه
ولا يستمع في صاحبه هرج نمام
كريم بالمعروف تندى كفوفه
شجاع، فالشدات ثابت ومقدام
غلاي عنده سار مع دم جوفه
وغلاه عندي ما توصِّفه الاقلام
الصاحب اللي نادراتٍ وصوفه
دورت عنه اليوم واتعبت الاقدام
سألت، واعطيت البشاير بشوفه
قالوا لي انت وين عايش فالاحلام
كلٍ ورا الدنيا يجمِّع ألوفه
جيبه صحيبه وانقطع وصل الارحام
وخوة مصالح والامور معروفه
وضاع الوفا والطيب والعالم اخصام
ضيف الله بن حمدان الدلبحي