ردّ الأمانه

يا صاحبي لو خانك الوقت قل لي
ودي اعرف إن كنت ذقت الخيانه
ما هو اهتمامٍ فيك لكن تسلّي
أبغى الشماته فيك قصد ولعانه
أبا انبش جراحك وبنزفك كلّي
لين الكرامه فيّ تظما الإهانه
ولا جيتني شاكي برحب واهلّي
واسقيك من برد الشعور امتنانه
واذكّرك باللي معك قد حصل لي
ويخونك اللي خنت فيني عشانه
بمسح جبين الحب من ذل ذلّي
واقول لك قدرك وضيعٍ مكانه
وإذا استفز الهم دمعي بخلّي
بيني وبين الدمع خطوه جبانه
وإذا انحنى عنق المشاعر بصلّي
واطلب من الله ما أخون الأمانه
بجمع طعون العام واقول سلّي
سيف انتقامك من صميم الإدانه
بقسى عليك إلين يرعبك ظلّي
واعلّمك وشلون تظما حنانه
واسلب بقايا خافقك بس علّي
آخذ بثاري منك ردّ الأمانه