طرقي

سريت مع طيف لفاني وانا ضيف
رحبت به قال البقا وانت ضيفي
يا حيف في سلم الاجاويد يا حيف
ضيف وترحبي ودمك خفيفي
قلت العذر يالي تعرف المعاريف
السالفة بين البطل والوصيفي
خلك معي ضاقت علي المحاريف
قال انت طرقي عجل ومرك كليفي
اقلط وتلقا هبت الريح والكيف
منته بلاقي كيف يشبه لكيفي
قلت أنت تأمرني وأنا امشي علي الكيف
امشي علي كيفك ولا هوب كيفي
قال الشتا قلت الشتا يتبع الصيف
وأنا معك هاذا ربيعي وصيفي
قال اشهد انك من رجال المواقيف
انا اشهد انك قرم منتب ضعيفي
قال انت شاعر وصف الوضع توصيف
قلت أنت مالك فلعذارى وصيفي
مالك وصيف وسط باريس وجنيف
والشام كله لا حشا يالطيفي
ونجد العذيه والحساوالمصاييف
وأبها وحايل والخبر والقطيفي
والطائف وجده ونجران وطريف
وعرعر وبيشة مع تبوك وعفيفي
ما شفت مثلك داخل المدن والريف
يا وجد حالي وجد منهو كفيفي
في ديرة ما شاف دربه ولا شيف
وقت المخافة والزمان المخيفي
عليك يا ظبي ترب المشاريف
يذيرك صوت الهواء والوحيفي
زينك حشا ما هوب كذب وتزييف
وجمال غيرك صار كذب وزيفي
ودي بشوفك لو تزيد التكاليف
انا حليف الجود وانته حليفي
من دونك الموت الحمر والمراهيف
ولا تراحبي وحبك شريفي
يا الله يا جامع قلوب المواليف
انك تقربني ويقرب وليفي