بيت الشَّعر

يبكي على مبناه في جال خبه
في جال روض زاهي بالنواوير
ينعش بريحه عشبها من يطبه
ربع مواريد وربع مصادير
تحت الذرا والرمث يازين شبه
يقول وقت راح لي فيه تقدير
من قبل ربعي بالحضارة تشبه
يا ما جلس بحماي ناس مشاهير
أهل الشجاعة والكرم والمحبه
ناس سوالفهم تزيل التفاكير
ما بينهم غش ولا به مسبه
ودلال بن بهرت خوش تبهير
من دله الرسلان يا زين صبه
يا زين صبه للرجال المناعير
اللي لهم بين النشاما محبه
ما يشربون الا حليب الاباكير
يشفي غليل الكبد عن كل طبه
يقول وقت راح لي فيه تقدير
من قبل ربعي بالحضاره تشبه
ياعنك جيل اليوم ما عاد به خير
يومه يقول البيت يابوي كبه
ياما حضنته في ذرايه وهو صغير
حاميه عن برد الشمال ومهبه
عقب المعزه صرت مثل الدياكير
في وسط قصر فيه صاله وقبه
تبدلت ذيك العمد بالمواصير
تبدل الفانوس في نور شبه
من واقع الذكرى كتبت التذاكير
من كان له ماضي لزوم يحبه
من دون نقص بالنشاما وتقصير
هذا هو الواقع ولاهي مسبه
سلبود بن عبدالعزيز السلبود
محافظة المجمعة