المعنَّى

الأمير خالد بن سعود الكبير الشاعر الجزل المميز وعد قراءه في مدارات فانتظرناه ولكن لم يكن طويلاً لأن ما وصلنا منه كان رائعاً كعادته..
(المعنَّى) نص شعري لقرائنا لإعادة قراءته مراراً:
طير ياللي كل ما ثار الغتار
وانعمست وضقت من فوح الهجير
انتهضت وشلت عمرك للمدار
رحت في جو الخضيرا تستدير
ضاربٍ بالهم في عرض القفار
ليتني مثلك على همي جسير
انت الى حسيت في جوّك غبار
طرت لين الهم يجلاه المطير
والمعنَّى لوه من ماكر حرار
ما قوى يكفخ ولا يقوى يطير
شربكه حبلٍ تلوَّى واستدار
والزمن لين انعقد حلّه عسير
لو تخلص من شرابيكه وطار
ما تخلص من شرابيك الضمير
آه من نجمٍ وعدني واستخار
يحسب اني في رجال ليله أسير
مادري ان الليل يمحاه النهار
والليالي لو تعسَّر ما تحير
والمحبه بين موتٍ واحتضار
من نسمها باقيٍ نزرٍ يسير
ناشبه ما بين نار وبين غار
والقدر في كف علام المصير
عند ربٍ ما كتب في اللوح صار
لو يقولون الملا لا ما يصير
عل قلبٍ ما يحس ولا يغار
ينصرم عرقه وهو توّه صغير