لا تحاسبني

اترك عتابك حبيبي لا تعاتبني
النفس فيها من الاحزان ما فيها
مع ضيق نفسي رجاءً لاتحاسبني
لاتشعل الروح نيران تصاليها
كلمة عتاب تجيني منك تسحبني
لا قصى حدود المواجع يوم ترميها
تدري لو انك من اقصى النزف تطلبني
جيت وجروحي نزيف الجرح يدميها
يا منبع الحب واحلام تداعبني
ابيك تراف بحالي لاتعنيها
كل القصايد لدربك دوم تجذبني
حبك بحرها وخفاقك موانيها
أكتب قصيدي وأحسه دوم يسكبني
داخل حروف القصيدة وبمعانيها
وبكل بيت تشوف الحب يكتبني
يرسم ملامح حياتي مع أمانيها
اقرا قصيدي فدتك الروح قربني
خذني لدنيا بمزن الحب تسقيها
باروع فؤاد ملكه إنسان يعجبني
بأعيش وردة بوجدانك تراعيها
وقل لي أحبُك وأحبُك موت تطربني
تسعد فتاتك، تحط الكون بيديها
حبيب عمري مع أن الحب عذبني
تفداك كل الجروح اللي أعانيها
تعال واطلب سنين العمر جربني
أعطيك عمري، وأنا لاقلت أعنيها
تدري حبيبي، بكيفك لو تعاتبني
يكفي حياتي وجودك نعمة فيها