عهد الوفا

الشر زال وكل سوَ به اخطاك
جعل السعد لك يا ملك والسلامة
سقنا البشاير والتهاليل بشفاك
من الساحل الشرقي إلى أقصى تهامه
ديوان حكمك تسمعه يوم هناك
وهنا من الفرحه روابي الثمامه
ونجدا تزَّين لك بعز وتفداك
وتلبَّسك بشت الفخر والكرامه
وطويق سرَّه وانحنى لك وسماك
رمز العلا والعز راس الزعامه
والورد فتح والمعالي تغناك
ورقصت من الفرحه سيوف الشهامه
من كل صوب قاصي الناس لك جاك
الكل يبكي والحزن في كلامه
ميزك رب الكون بالصيت واعطاك
حب البشر مرسوم فيكم علامه
يا شيخ يا اللي منبت الطيب يمناك
يا معلياً بالمجد موضع مقامه
يا متعباً كل الصعيبات ممشاك
الصعب في وجهك تجيه الندامه
لا من وقفت الوقت وقف وحياك
يهاب منك لا نزعت العمامه
ولا من جلست تجلس الطيب برضاك
شيخاً جلس والطيب حط غلامه
ولا من مشيت المجد في حد ما طاك
يتبعك وانت واحدٍ من عمامه
تشرق أنوارٍ يوم طلعة محياك
من دونكم يقصر علو كل هامه
وحنا على عهد الوفا لك وبحماك
الشعب لك بالصوت يعلن تمامه
فيك الكرم والجود والخير مبداك
والحلم والحكمة وفيك الصرامه
يا زارعاً واحات وجبال من ماك
يا باني النهضة وقبلك هدامه
ما به غرابه واكرم الناس رباك
يا جعلها بالخلد ترقد عظامه
نرجي رضا الله يا فهدنا ثم رضاك
عساك دايم يا ملكنا بسلامه