نبايع ملكنا

ما قدر الخالق على العبد مقسوم
والموت حق وكلنا من ضحاياه
وأسوأ نبأ هز المشاعر ضحى اليوم
والكون هزه.. ليتنا ما سمعناه
قالوا فقدنا هيبة المجد زيزوم
اللي كلامه يرهب الكل واعداه
فهد صليب الرأي ما يلحقه لوم
خادم بيوت الله وتعيش بحماه
عساه في الجنه مخلد ومرحوم
وما قدمت من خير يمناه يلقاه
الصالح العادل ولا همه خصوم
النابه اللي طاع دينه ومولاه
ولنا البقى في أسرةٍ كلها قروم
آل سعود وفعلهم مثل ممشاه
الرأي واحد رأي صايب ومحكوم
وما بينهم منهو برايه تمثناه
والشعب شعب المملكه دايم الدوم
ياقف وراء الحكام والحكم يرضاه
نبايع ملكنا عزنا سيد القوم
عبدالله اللي ما تعدد مزاياه
القايد اللي صدر اليوم مرسوم
حدد ولي عهده وحنا قبلناه
على النقاء والخير واعراف وسلوم
وعلى الذي قدمه في فعل يمناه
والشعب في رايك وحكمتك ملزوم
يا القايد اللي كلنا من فداياه
حنا جنودك ما بنا سيف مثلوم
عدونا تاهت به أفكار دنياه
ما فيه ببلاد الحرمين محروم
الكل منهم حايز المجد والجاه
ولا فيه ببلاد الحرمين مظلوم
الحكم حكم الرب والعدل منشاه