ضيقة صدر

أنا بليت بهاجسٍ منه ما ذاه
يفكني ساعة وعاد وخطفني
يغيب وافرح واتفاجا بملفاه
وليا انحرفلي مع طريقة حرفني
واليا شرد ذهني وسجيت قلت آه
حقيقةٍ يدري بها من عرفني
شرود ذهني فيه سر المعاناه
واحيان يكتب سرها نون جفني
واخفيه عن شوف المخاليق وامحاه
وليا انتبه راع النباهه نكفني
وأقول ضيقة صدر تآخذ وتدهاه
شيءٍ ولفته من قديم وولفني
امشي بكبر طويق بالصدر واكماه
ولا أقول لحدٍ شوف ما بي وشفني
ادفن بصدري واحسب حساب الأفواه
فمي خلق الله بهن كشف دفني
غيبي ليا منه تبين لو أدناه
ودرى به المبغض هذاك وكشفني
سلمت للمبغض حصاةٍ بيمناه
فيها اذا احتاج يحذفني حذفني
ولو اختلف فكري ما لومه بما جاه
تتابع الصدمات يخلف ويفني
من قرب الغراف من بيره وماه
شرب منه واسقي نظيفٍ وعفني