مثل البرد

ليا هفت شمس العصير وتقفّت
تالي نهارٍ راح والليل قافيه
قمت أتلفت بس وين اتلفت
وأنا ادري ان الليل سودٍ منافيه
ما ألوم عيني لو بها الرمش رفّت
والقلب معذورٍ ولو باح خافيه
سواده ان مد الهموم الك وفّت
وان مد لك فتق عجز عنه رافيه
مثل الفشل فيه الاماني توفت
مثل السراب ان جاه من عضّ أشافيه
يا ما رجيته لين الارياق جفت
وياما غرقت بغبته عن مرافيه
وأمواجه اللي كل ما قلت خفت
زادت وأنا واحد لهمي مكفيه
وضلوعي اللي منه ما قد ترفت
يمر مثل البرد لو الدفا فيه
وغيري يشوفه مثل الأعياد لفّت
طفل فرح بالعيد والثوب كافيه