خل الهجر

تل النداوي للسبوق الملاويش
حرٍ قبل طرح العشاء عادةٍ له
واليوم محروم الهداد اشقر الريش
يا زين خل الهجر والصد خله
أنا عروقي من حنانك معاطيش
حبك ولع والقلب ليتك تدله
عطفك ولينك والقراح النشانيش
عسى مطر غيمك خفوقي يبله
وعسى المحاني في فلا غيثك تعيش
خلك تلم الليل مدري تفله
وخلك تعذب ضافيات العكاريش
يا صاحبي يا بو رموشٍ مظله
سود تحت دعج النواعس معاكيش
أنا حياتي في غيابك ممله
خليتني بين التعب والمطاريش
أمسيت ليلي بالهواجيس كله
وأصبحت لين عيون صبحي مشاويش
يا وجد حالي وجد من مات خله
أو وجد من خلي ورى الخيل والجيش
أو وجد من شاف القهر والمذله
في ساعةٍ صكوا عليها المداغيش
يا صاحبي يا بو رموشٍ مظله
خليتني بين التعب والمطاريش
غنام بن سنيد الهمزاني
حائل