أمنية

وبرٍ وذود ولا تشوف المباني
لاجا العصر والمزن هتان ويسوق
والماء تشوفه حايرٍ بالمثاني
ريح المطر ريح النفل رقص زملوق
وان هب نسناس الهواء بصفقاني
ريضان ونشوف الزبيدي ورقروق
وريح الخزامى عانق القحوياني
ومعيه خفيف الدم مع زين منطوق
ما قلتله كلمة وفيها عصاني
ما هو غشيم صاحبي عالي الذوق
تحتار في وصفه جزال المعاني
اسرح انا وياه ونرتع النوق
ولا يغيب عن عيني عشيري ثواني
بارضٍ قفر ما طبها كل مطفوق
بعد المطر ما طبها مودماني
بعيد عن هرفي وكودو وعن السوق
وعن زحمة الديرة وشوف الفغاني
وبعيد عن نقالة الهرج بطروق
اللي لشين الهرج تصغي الاذاني
حميد بن موسى السليمي - الرياض