غر السحايب

يالله تسقي بالمطر مرتع النوق
يالله عسى غر السحايب تعله
عشرين ليله ديم رعاد وبروق
على المراتع كل ماها تهله
لين الحجر يزهر بعشب ورقروق
والأرض تلبس من بها العشب حله
فيها النفل لا فاح عطره بزملوق
يجلي بريحه من عنا القلب عله
والقحويان اليا كسى الأرض من فوق
كنه ثلوج غطت الروض كله
يازينها لا بين الصبح بشروق
وشفت الندى من فوق الأزهار طله
ومن قبلها لا غط بالنوم مطفوق
أسجد لرب البيت خوف ومذله
هذا هوى نفسي وما فات ملحوق
والعمر عند الرب كثره وقله