مانيب سالي

البارحة نومي على الكوع والجوع
والهم ربع في ضميري وفلى
كني فطيم عن هاكالديد ممنوع
واللي نبي من حلو الايام ولى
دنيا بها الخايب إمولع ومسبوع
والطيب من روس الرجال اضمحلى
يقطعك ياوقت به الكذب مسموع
وراعيه عدا بالطوال وتعلى
الكبد من وقتي بها افتوق واملوع
كنه على جال المليله اتملى
كني المريض به القلب مزروع
أوحال مظلوم من الضيم صلى
ولي ونة من سمعها هج مفجوع
ودمعي على الخدين سبل وهلى
والله ماللفرح في مهجتي بوع
مانيب سالي لو بغيت اتسلى
عليك يا غرو من البيض مربوع
كن الشهد من حلو ريقك إمحلى
خطر على قلبي من إعيونك يموع
ياللي غرامك للفؤاد استحلى
ودون للخبرا ترى الشوق مدفوع
اللي لهم في وسط قلبي محلى
عند القروم إمدلهة كل موجوع
هم مسندي لا اقفى الرفيق وتخلى.