سجدة ودمعة

عودت لدروب الشعر عقب عامين
يوم السحابة أقبلت مع رعدها
في خاطري بيتين والزود بيتين
وان زادت اقر ولايهمك عددها
ترى السهر واحد وطلابه اثنين
خله بسجدة ياسعد من سجدها
وبدمعةٍ تهتز منها الأراضين
وسهام ماتخطي وربك رصدها
ساهر مضى وقته ب/ياليل ياعين
وساهر عرف درب الجنان وقصدها
يناجي الخلاق والناس غافين
ماتنفعه ساعات سج ورقدها
ياعمري الماضي تقل مر يومين
ماكنها مرت ولااحدٍ شهدها
مرت بما فيها من العسر واللين
بافراحها. باتراحها. وبرغدها
ودعت فيها اللي على القلب غالين
حسبتهم دايم لنفسي سعدها
تملكوا روحي وغابوا عن العين
عزي لروحٍ غاب عنها سندها
ياعلهم في جنة الخلد باقين
يغسلهم المولى بصافي بردها
وياجعلهم بين الرسل والنبيين
في منزلة ياعز من هو وردها
يادمعتي قولي لكل المساكين
بكرة تسج المرضعة عن ولدها
ياقرب موعدها ولو باقي سنين
تماكن الصحة قبل تفتقدها
راح الفقير وراح راع الملايين
وش بقّت الدنيا لحي ٍعبدها
ولو تمهل الأيام مايمهل البين
والعين ماتدري بموعد رمدها
ليلى سعد الحربي - أم محمد