ما شفت من يزهاه

ماني بمنكر فيك مغرم ومفتون
وأصد لا مرّيت وأكبح جماحي
واشيخ في ساحل حجاجين وعيون
ومرافي.. فيها يزيد انشراحي
الكحل خلقه.. والحجاجين مقرون
يسجنّي بنظره.. ويطلق سراحي
ما شفت من يزهاه بالشكل واللون
نهده سهومٍ والرموش الرماحي
عرضه نزيه من الشوايب ومصيون
ومن دونه الغربه.. وموتٍ متاحي
بلا تصبر وأبلغ الريق بالهون
وثبّت اقدامي وأعاين مطاحي
لو ما شكمت النفس ما دونها دون
لا نطح ذويه بالبكاء والصياحي
إما معي يبكون وإلا يصيحون
وإلا تروح عظام جنبي لواحي
يا بنت أنا ماني بشاعر تليفون
ومغازلاً في الليل لين الصباحي
أنا عزيز ومن رجالٍ يعزون
ومصايد الغرّات ما به صلاحي
أخاف أهلك بغفلةٍ منك يدرون
لو كان ما تبغين هرجٍ مباحي
وش عرفك يا بنت ما ني بمجنون
وأعرض أوراقك هبوب الرياحي
العرض من دونه هل العرض يثنون
ودون الشرف تشهر خشوم السلاحي
وبيت دخلته بالمعزّه وأنا أمون
وكم ليلةٍ جتني ركونه اسناحي
حلفت ما أخونه ولو اني أخون
لو كان رأسي يندفن بالمساحي
- الشاعر/ عبدالرحمن أبا الجيش