العيد

جرَّب وشاف من الحياة الهوايل
من يختصرني في رسالة بجوال
أصد ماني من هواة الرسايل
لو هو صحيح يحبني مثل ما قال
ما حال دون أمواجهي أي حايل
ألبس جديد اللبس ما البس لي اسمال
محدٍ عن اللي داخل القلب سايل
ليت رمضان اللي رحل أمس مازال
يمكني ألقى في رمضان الدلايل
والوقت راسه صلف ويدينه أطوال
لو ميَّل أكبر راس ماني بمايل
وانا على خبرك على كل الاحوال
ما ارضى الحلول ولا أحب البدايل
بحج وادفع لي زكاةٍ من المال
واتوب عن كل الفتن والعمايل
ما دام في ديني مفاتيح الاقفال
خزاين أكبر قوم واسمى عوايل
مهرٍ ما عنّه بالرسن كل خيّال
مهرٍ أصيل من مرابط أصايل
ولا قام يستعرض بالاقفا والاقبال
تحذف عمايمها عيال الحمايل
الله وهبه بكل ما جا على البال
من الجمال اليوسفي والخصايل
خصايلٍ من البدر عاده أهلال
ومن الهلال اليا اكتمل شيء هايل
انته الحال وكل خلق الله الحال
لانك لصل والا البني رد فايل
غيرك مثل والا انت مضرب للأمثال
يزول غيرك وانت مانته ابزايل
احترت ويش اهديك يا مهدي الشال
شالٍ على صبره من الكحل سايل
أرفع لك الطربوش وأخضع لك اجلال
خضوع حرٍ كاسيته الجمايل
ما ابشع من اللي يعشقك غير الاهمال
وبه شيء ثاني بس ماني بقايل
الشاعر - عبدالرحمن أبا الجيش