نشرنا في عدد الأسبوع الماضي لغزاً كتبه الشاعر سويد عقلا العنزي ونصه: يا ويش عذرا ما تجيبه ملايين ولا تغتني عنها جميع الخلايق خواتها بالعد تسعة وتسعين علم أكيد ومثبت بالحقايق يحتاجها السلطان وأيضاً المساكين ويسوقها من سامك العرش سايق وقد جاءت الحلول الصحيحة كما يلي: يا راكب اللي سابقه للشياهين باذن الولي ماله عن الدرب عايق من نوع ميراج ثمنها ملايين تاصل لمنهو نشر الألغاز شايق اللغز حله واضح للفهيمين ومنهو صلح في رحمة الرب فايق زايد بن ونيس الحازمي طريف *** أبدي بذكر اللي له الخلق داعين الواحد المعبود رب الخلايق يا الله طلبتك رحمتك قولوا آمين اللي رحم يونس بعد ما تضايق علوش محمد العضياني الرياض *** يحق لك يا تراثنا لو تباهين كل لجل شوفك يعد الدقايق وياللي كتبت اللغز حققت ثنتين صياغته تجذب ومعناه فايق يا سويد الرحمة لها الناس راجين والا البشر ما هوب للنار طايق عطا الله بن سليمان العطا الله الزلفي *** أبعث سلامي من بلاد الجبلين عبر الجزيرة بالسطور الرقايق الشمري ولف من الشعر بيتين للوائلي نص الحلول الحقايق أعطيك حل اللغز من دون تخمين رحمة ولي الكون محص الخلايق راجي نواد الشمري حائل *** يا الله ثبتنا على العدل والدين وأرحم عبادك يا إله الخلايق يا محصي أعمال البشر بالموازين أنت الذي ما دون خيرك عوايق صويلح بن عيبسان الشيباني الرياض *** لقيت ناس بالجزيرة كريمين واللغز جيد في معانيه لايق قاله سويد والجماعه حريصين كل يفكر قدر ماهوب طايق الحل رحمة كان حنا رحيمين فالله يرحمنا لرحم الخلايق علي رشيد الرشيد رياض الخبراء *** مطلبك يا سويد على الراس والعين لا صار ياللي يابن الأجواد رايق هذا جوابك دون شك وتخمين عبر التراث اللي بها المدح لايق رحمة ولي العرش غاية هل الدين يوم الجزا ما ضيقوها الخلايق فهد بن عقيل الطويان بريدة *** سبحان رب يبدل العسر باللين رب رحيم وعالم بالدقايق في رحمته خلا الخلايق معافين ما عاقهم عن نصرة الدين عايق انزل لهم رحمه وعنده تثامين تسعين مع تسع بعرشه وثايق عبدالرحمن محمد الجروان الزلفي *** يا الله يا منزل تبارك وياسين ويا منزل الرحمه لكل الخلايق ويا خالق رحمه وتسعه وتسعين أبقيتها عندك وهاذي حقايق وتسلم على التفكير والمنطق الزين يا بو محمد صغتها وانت رايق كريم عيسى العنزي الخرج *** اللغز يا سويد لقيناه بالحين كني على قلبك مطل موايق ذي رحمة الرحمن عنها براهين بكتابنا المنزل وكتب ووثايق جمال الفقير الخرج *** عبر الجزيرة نبعث الحل قافين بعد الفطور البال هادي ورايق الرحمة اللي عمت الخلق هالحين تعمنا رحماه يوم الوثايق رحمتك يا رحمن تغفر وتنجين في ساعة منها الثقلين ضايق محمد علي السالمي رفحاء *** اللغز ما يحتاج شرح وتبيين مرتب معناه والوصف لايق ألقاه ابن وائل عسى عمره سنين وحله لدي موجود والبال رايق رحمة جليل الملك رب المصلين مفرج الكربة على كل ضايق محمد هذال البريك الاتصالات *** الحق ماله ياهل العرف وجهين حاشا ولا له بين الأجواد بايق يا ما رجح نهجه بكل القوانين يعلى ولا تعلى عليه العوايق عشنا بأمانه يا جماعة عزيزين برحمة إله الكون صرنا رفايق فهد الجروان الزلفي *** يا مرحبا واهلين يا بن الكريمين يا بن الرجال اللي تعرف الوثايق واللغز حله حسب تسعة وتسعين رحمة اله العرش رب الخلايق خليف الحربي الرياض *** لا تغتني في رحمة الربع الادنين ما ينفعونك كان مولاك عايق وإلى رحمك الرب عدل الموازين يغنيك عن رحمة جميع الخلايق عبدالرحمن محمد التركي الرس *** يا مرحبا بك عد من داج بالصين واعداد ما بالكون مرت دقايق لغزك يا بو عقلا لمحناه بالعين والحل واضح ما تغشاه عايق حنا على الرحمة من الرب شفقين وفيه الرجاء يغفر ذنوب عتايق محمد بن حمد البدر الزلفي *** يا مرحبا بك عدنبت البساتين ياللي كتبت اللغز والبال رايق لغزك على حله لقينا البراهين عند البخاري كان تبغى وثايق يالله عسى الرحمة تعم المسلمين ونكتب من اللي من جهنم عتايق عبدالله بن حمد البدر الزلفي *** أحسنت سبك اللغز وصف وتبيين واسلوبك الجذاب عذب ورايق يا ماحلى التعليم والفقه بالدين يجلي هموم النفس عند الضوايق مسكين يالمحروم مسكين مسكين من رحمة المعبود رب الخلايق فهد المحمد الحزاب الرس *** بديت باسم اللي له الناس راجين الله يكافينا صدوف العوايق بعده نحل اللغز في ضمن بيتين مادام فكري للتماثيل رايق نعطيك حله صح ما هو بتخمين رحمة تراحم به جميع الخلايق دخيل فضي الشملاني العنزي الرياض *** يا مرحبا باللغز لغز الميامين من صاحب ما هو من الحل ضايق اللغز واضح مرفق بالبراهين هي رحمة المولى قوي الوثايق هي جبرة الميه بنصب الموازين الدرب واحد سكرن الطرايق بندر بن عبدالله الحنيني القصيم *** الكلمة اللي تبتسم بين قوسين لو قلت هذي ثلج شبت حرايق وان ضاق صدر الكون بين المحبين تمطر سما الرحمة على كل ضايق محمد عبدالكريم الغزي الزلفي *** يا لله يا منزل تبارك وياسين يا عالم ما خفت جميع الخلايق يا لله انا طالبك رحمة وتنجين يوم القيامة يوم كشف الحقايق يوم به العالم حفاة وعارين ومع كل نفس جاء شهيد وسايق صالح عبدالله الزرير التميمي الرس
