هذا هو العيد

متعب بن زراق

أقبل نهار العيد ينفح نسيمه
تظهر به الفرحة على روس الاشهاد
عيد ينادي كل نفس كريمة
اللي لها مع بسمة العيد ميعاد
والعيد ما يحسب بحجم الوليمة
ولا مستوى التحضير فاللبس والزاد
العيد نخوة واعتزاز وعزيمة
ونشر المحبة والسخا بين الاجواد
والعيد في نجدة يتيم ويتيمة
و(رملا) موريها العوز مر الانكاد
والعيد في مدّ اليدين الرحيمة
للعاجز اللي للعطيات يعتاد
ومجانبة راع الردى والنميمة
اللي لغرات الاجاويد نقاد
والعيد له قيمة مروة وشيمة
في فزعةٍ حرة وفي وقفة امجاد
أسلافنا حازوا على كل قيمة
بزين السلوم وسلموها للاجداد
وحنا توارثنا السلوم القديمة
رسايلٍ لازم تسلم للاحفاد
لنا على فعل الفضايل وسيمة
ولنا مع المعروف همة وميراد
لا تحسب الدنيا.. تراها وخيمة
ظل يزول ولا ورا الظل مقعاد
أخاطب اصحاب العقول الفهيمة
والعىِ لا يقبل خطابه ولا عاد
نبى نهار العيد روحٍ حميمة
حتى يدوم الفضل وتزول الاحقاد