كل الأسباب

لي حاجة عيت تهيا وأنا شاب
لا شبت ويش ابيبها لو تهيا
بذلت لجل آصل لها كل الاسباب
فوق الثرى من تحت نجم الثريا
اطرد وراها واتعزوا بالأنساب
لي ثار وأبا اقول يابا الثريا
مشفي ويدفعني لها شوق وإعجاب
مرهي وأقول هناك وألا هنيا
لكنها اركتني على (حزم كلاب)
راحت وفي كبدي عليها شفيا
ما اهملت مير الوقت ودا ولا جاب
ماهوب مع شرواي سمح المحيا
كم لي وأنا اطرق باب واصد عن باب
وعن شمس نجد المحرقه ما اتفيا
وكم لي وأنا اعض الشفايف بالأنياب
وأقول راح العمر كله كذيا
كنيتها حتى عن اعز الاصحاب
لو ما على علام غيبي كنيا
صادق ومن يقول كذاب كذاب
رقيبي اللي فالمعاليق عيا
لا اقول هذي حاجتي ياهل الألباب
على يدين اللي براسه حميا
فراج الكرشمي