كسر الوفا

العام غير وهالسنة وضعنا غير
كود السلام ان جيت بالدرب عابر
وقولة صباح الخير والامسا الخير
اللي دفن شيخ الوفا بالمقابر
ما ظن مثله له مع الناس تقدير
وين الوفا يوم الزمن كان غابر
وانته على الطيه وانا بقاعة البير
كسر الوفا بالعذر ما هوب جابر
ولا تجبره عندي سمان المعاذير
صحيح من قال الأوادم مخابر
الحر يشهر والحباري مخامير
نسيت بالشطات من كان صابر
يوم ان عمرو وزيد قفوا محادير
غديت لك ملجا ورامي وسابر
لين انها زلت هبوب المعاصير
ولا بغاك ترقيني بروس المنابر
رد الثنا لراعيه واجب على الغير
لكن ترا ماني على مانت خابر
لو تعلن القصة مسلسل وتصوير
ممشا الرفاع ولا طمان المعابر
روس الهضاب أفضل من الوكر للطير
عبدالرحمن حمدان الصالحي