خالد بن بندر وللجد حزات

بعد تعيين صاحب السمو الملكي الأمير الفريق ركن خالد بن بندر بن عبدالعزيز قائداً للقوات البرية، كانت هذه المشاعر الصادقة..
كتفك مساحات الرتب والمروات
وراسك شموخه فوق تيجان ونجوم
لك بالمروة مد شوف ومسافات
دايم لفعل الطيب مجبر وملزوم
كانه لغيرك صادفت بعض الأوقات
انت المروّة فيك في دايم الدوم
وعنك الحديث إن قيل نسمع روايات
كلها تشرّف في مواقيف وعلوم
يا سيدي خالد يبي لي مساحات
أنثر بها فل وخزامى وقيصوم
شفها تزاحم لك جميع العبارات
وتلبس لك أحلى ما يفصل من اهدوم
تستاهل القايد من أعلى القيادات
من خادم البيتين من فارس القوم
ويستاهلك بالبر جيشٍ وقوات
يستاهلك يومه صدر له بمرسوم
تصغر بكفينك كبار الملمات
وتطوي بصدرك كل ضلعان وحزوم
مثلك مهم إن جاء زمان المهمات
قايد شغاميمٍ بها صبر وعزوم
تاطى على راسٍ نوانا بنيات
لا شايفٍ راحة ولا ذايقٍ نوم
أرض السلام أرض الحرم والعبادات
لا ما تدنسها رعاديد ورخوم
أرضٍ بصدره خير والجوف خيرات
للداني والقاصي بها الرزق مقسوم
خالد ابن بندر وللجد حزات
وحزات للرحمة مثل سيل وغيوم
كتفك مقص وتاج ونجمة وشارات
وفعلك تواضع طيب وأخلاق وعلوم
الشاعر: عبدالعزيز بن عبدالله السناني