محاورة الأسبوع

هذه المحاورة جرت بين الشاعرين الكبيرين/ الشاعر الكبير شليويح بن شلاح المطيري والشاعر الكبير/ مستور بن تركي العصيمي وذلك في عام 1406ه بمدينة عنيزة..حيث كان قبل بدء هذه المحاورة احد الشعراء الشباب المبتدئين يتحاور مع الشاعر الكبير/ مطلق الثبيتي «رحمه الله»
* شليويح
انا وايا العصيمي كيف ظعنا داخل الطوشه
وابو غليون ولع جمرته في راس غليونه
ترى بعض الاوادم يحسبن الملعبه هوشه
سوات الموتر اللي سايقه يلعب دركسونه
* مستور
ليا صلعت راسك عندنا ندهن لك الشوشه
والا يا ربع ابن شلاح قولوله على هونه
انا ماني براعي باعة بالسوق مغشوشه
اصرفها. واحرفها تجي وتروح مزيونه
* شليويح
بعد حنا كتبنا لك حروف الخط منقوشه
نبي رد الجواب ودهنكم في جوف ماعونه
وبعد شفت الجنازه في سرير النعش منعوشه
نوسع قبرها واللي وراه يحول من دونه
* مستور
تلبس من ثياب بالعطر والورد مرشوشه
يابن شلاح لا ترجع غليص اللي يقولونه
دخلنا في بيوت من خيار الزل مفروشه
وحطينا الامانة في يدين ارجال مامونه
* شليويح
عليك الظله اللي دون عين الشمس منكوشه
وانا خايف عليك من المطر لاهلت امزونه
لقينا جدة المجنون مجنونه ومربوشه
وانا ماني مفتش قشها في جوف كرتونه
* مستور
لقيت الحاجه اللي عند ابن شلاح مخشوشه
مغير يشيلها ويحطها ويقول ملعونه
لك الله ما نخلي لك ياكود اعظام معروشه
ولو خلصت روحك يوم ثاني يوم مديونه
* شليويح
حصاة الزنقرة ما تزعل الا خشم نتوشه
وانا خابرك طيب والحرامي تكحل عيونه
قنصنا للنعامة وانها بالملح منحوشه
من سلاح العيال اللي قطرها ما يخونونه
* مستور
تبات الناس عنك بخير تصبح منك ملبوشه
واثر كبدك عليهم من قديم الوقت مغبونه
جمال عقيل مرت مع مفيض الريع محيوشه
وراعيها يدور للتمر في رأس عرجونه
* شليويح
علامك يالرحى خليتها كسره ومجروشه
يبا يدخل ويطلع حبنا صافي على لونه
مفاتيح الكفر في داخل الكماش مكموشه
تداير فالكفر يومين وازريتو تفلونه