زهرة ربيع

في راس مرواس يزاهي ربيعه
متخالطٍ ما بين حواء وبسباس
وخصاب وأشجار والسدر به منيعه
وزهرة ربيع هزها ريح نسناس
وفاحت روايحها بزين الطبيعة
اعصير قبل الشمس ترهف بالأشماس
وبان الشفق والليل بين هجيعه
ذرفت أنا دمعي بلاحد وقياس
من سبتك ياللي نويت القطيعه
هجرتني وانت الذي بين هالناس
حبك بقلبي مشتريه ولا بيعه
وش السبب ياصاحبي جعل ما باس
وأنا معك فامرٍ تقوله اطيعه
خليتني اضرب بالأخماس الاخماس
ولا همني الآخر ولا في الطليعه
ان كان حدوك المقاريد الانجاس
ترى التطبع ما يغلب الطبيعه
ارجع على اصلك يالغظي طيب الساس
واترك علوم اهل العلوم الدنيعه
وان كان فعل ابليس خناس وسواس
ذكرك لربك واجب بالشريعة
وانا تراني من سبايبك محتاس
وترى حياتي يا وليفي مريعة
ولو قلت ابشرحلك على جنب قرطاس
مليت لك ما بين الابطح وريعه
محمد جازي القثامي