لبست ثياب ألماس وأغلى اعقدها

الشاعر حشر بن عبدالمحسن بن حشر بن حميد
يا مرحبا يا امير نجد وسعدها
عودتك يا سلمان يوم العيادي
يا عزها ويا نورها ويا فهدها
ويا غيثها الممطر على كل وادي
ويا روحها ويا قلبها ويا جسدها
ويا سيفها عن كل مفسد وغادي
يا ريفها ويا سيدها ويا ولدها
برّيتها من كنت طفل المهادي
فيك القوافي تتعب اللي قصدها
محصيت وصفك يالكريم الجوادي
يا فرحة شعوب الجزيرة سندها
عودتك فرحة حضرها والبوادي
وأحلى العواصم عاصمتنا وحدها
الفاتنه بالزين درّة ابلادي
لبست ثياب ألماس وأغلى اعقدها
لابن السعود مطوعين الأعادي
تحكي تواريخ السنين وعددها
عن شيبها قدام وقت الروادي
أمجاد أبو تركي موحد بلدها
عبدالعزيز اللي تعلى الشدادي
رام المعالي فالشباب وصعدها
وقادها للعز رجلٍ قيادي
وصى بها عيالٍ تصون لعهدها
عدو بها ركب الحضارة وكادي
ويعيش من واد الفتن في مهدها
بالحزم والراي الحكيم السدادي
هذاك أبو متعب مجوّد عمدها
من دونها يحصد لروس الفسادي
عمر حضارتنا وزاد بمددها
في كل حيٍ حط صرح اقتصادي
وسلطان عذبات الموارد وردها
نهر الجزيرة درعها بالعتادي
والنايب الثاني املها وعدها
عين الشعوب وقلبها والفؤادي
واعداد ما تمطر ويرعد رعدها
صلوا على محمد نبي الرشادي