عام وسنة

من قال لك عام فالتاريخ يعني سنة؟
ما عشت لك عام نوب أثقل من أربع سنين؟
الجرح عمره يفوق الوصف والأزمنة
حامي ولا شيف يلبس ساعته في اليمين
ما هو سواليف خبلٍ له وفيه ومنه
إلا مواقيف راسٍ يابسٍ ما يلين
واللي يحط الردى طيبٍ يخسر رهنه
ما هو رفيقٍ لرجالٍ ينومس حزين
واللي براسه مواويلٍ يجيب لحنه
واللي يدينه قصيرة لا يمد اليدين
ومن ردد الهرج عن غيره يردد عنه
عليه دينٍ لناسٍ جت توفيه دين
كلٍ له لسان والدنيا وراها ألسنة
ولا فيه حاجب تعلت فوق علياه عين
ولا خير في واحدٍ يفتح فمه لحسنه
ويزم نفسه تقول يوزع الرافدين
ومثله نظيف الثياب اللي بلاه بدنه
ما طهّر النفس من حقدٍ قديمٍ دفين
وبعض الأوادم تقول إن الظلام وطنه
يستعدي النور حتى لدغته ما تبين
إيه الرجولة مبادئ تكره الورعنه
حذراك تحرص على الفرصة قبل لا تحين
ومن قال لك عام بالتاريخ يعني سنة
قله: غلط حزن عام أطول من أربع سنين