ولا مخلوق ولعني

لحظة.. بوادعك قبل إنك توادعني
ماني من اللي تروح ويمشي خلافك
لي عزةٍ يا وليد الناس تمنعني
لو قلت.. ما بيك تمزح.. خاطري عافك
قد قلتها لك قبل ما كنت تسمعني
واليوم فعلك هو اللي حطم أهدافك
يابن الأوادم نصيحه واخذها طعني
ما كل شخصٍ يذل النفس لا شافك
صحيح زينك ببعض أحيان شجعني
لكن زود الكرم زودت بسرافك
ماهوب أنا اللي تنزلني وترفعني
لو درت في نيتك كسرت مجدافك
تبي الصراحة.. تصدد لا تطالعني
أخاف من دمعتك ولا انت ما اخافك
ماغير واحد.. ولا مخلوق ولعني
الحب يجرف ولا تختار جرافك
لو قلت لحدٍ تحب.. وقال لك يعني
خله وبَعّد ما دام الوقت ما طافك
أصارع النفس والدنيا تصارعني
والفرق واضح بمغرافي ومغرافك
ياخي ترى القلب عيا لا يطاوعني
يابن الأوادم توكل خاطري عافك