صمتي وجعني

بالله ياراعي المناقيد دعني
مانيب تاجر والقصايد بضاعة
حرام أعوَد واأتبع اللي تبعني
وحرام أقول أزريت عقب استطاعة
سكت لين اونست صمتي وجعني
وجمال شعري زاد صمتي بشاعة
والشر سيفٍ ماقطعته.. قطعني
والخير في قلبي شعور وقناعة
والطيش ياما للمكاسب دفعني
والصبر في بعض المواقف دناعة
وإن قلت.. أنا بقول.. وأقول وأعني
بالقول طلت اللي يعسر الشجاعة
أنا نفعت الشعر لو مانفعني
ماخلف هذا الجوع غير المجاعة
شعري شعوري صانعه ماصنعني
الشعر عندي روح قبل الصناعة
كان النسب عن الردا مارفعني
ساويت في طيب النسب والوضاعة
وإن كان قلب اللي أحبه وسعني
ماهمني ضيق الزمن واتساعة