"الخالدية"

أبي أهني سيد"الخالدية"
القرم خالد سيدي ذرب الإيمان
بأبيات قلته في سموه هدية
يستاهل مهار القصايد وقيفان
فريق أول رتبته عسكرية
ومعها مقامه عندنا بين الأعيان
خالد ولد سلطان يالله حيه
أبوه حامي الدار كعام عدوان
شيخ معرب عزوته وايليه
جده أبو تركي وأبوه سلطان
سلطان خير وكف يمنى ندية
ملجا الضعافا والأرامل ويتمان
مجدك ورثته ما شريته شرية
من سعود ومحمد ومقرن ومرخان
ومانع وموسى والجدود الزكية
ومن وايل لبكر لربيعة لعدنان
ولك لابةٍ ما تعرف المرحمية
يوم اللقا لصار به عج وطعان
ما يركبون مهارهم للردية
مركابهم لا من غشا الجو دخان
يوم إن خطو اللاش خلا خويه
ينخا بعالي الصوت يا فلان يا فلان
مزبان من ضاقت عليه الفضيه
إخوان نورة بالوغى حي إخوان
يفوز ابن سلطان في كل هيه
ما هي غريبة عن سلايل كحيلان
وممشاه بالميدان ما هو شويه
هيبة أبو تركي وهو ممسك عنان
الفوز من خالد وخالد سميه
وخالد خوي الفوز للفوز عنوان
والفوز حققتوه ما هو عطية
بأمهار جابت كؤوس أشكال وألوان
ومع الخبر منشور صورة بهية
فازت مياسك مع ديكارو مع ليان
وماركيز بسم الله ما فيه زيه
فحل يفوز بكل جدارة ورجحان
والمهر باندوراس ذيب السريه
ليا من عرض من بين الأمهار فنان
ومعهم أثينا المهر العالمية
تبخترت كنه عروس بفستان
وعندي أنا إحساس ميه بميه
أنا أتحرى سيدي فوز سلمان
مهار عرايب من سلالة نقية
جناه حر ما يحسب للاثمان
يالله عساه يعيش عيشة هنيه
محفوظ من رب المخاليق رحمن
وسالم وغانم كل روحه وجيه
وفي كل ميادين الفخر حط نيشان
وللي يتحدى خيل راعي الحميه
أقول أنا يا معاند الموج غلطان