يا نجد لو أن الجفا منك مرة

ولا يدٍ إلا ويد الله فوقها
ولا ظالم إلا ويبلى بظالم
واعمارنا راحت نداري زماننا
ولا خير في عمرن مداراه دايم
ولا خير في عمر الفتى أو حياته
ليا عاد ما تكثر عليه الجرايم
لك الله ما ذقنا بنجدٍ طرابه
سوى العيد أو سوى ليال الصرايم
يا نجد لو ان الجفا منك مره
نصبر و لكن الجفا منك دايم
يا نجد وان جاك الحيا فارسلي لنا
مع الطير وإلا مع هبوب النسايم
يا نجد وان جاك الحيا فاصعقي لنا
صوتٍ رفيعٍ موقظ كل نايم
سرنا خلا العد تسعين ليلهْ
لديار قومٍ من كبار العمايم
سعوا لنا بحبال شّرع قطايب
حطو يدينا من ورانا حزايم