«أبو المعاطي» الديموقراطي

مش مستحمل أسمع كلمة بترفض رأيي ومش قابلاه
وبحب اللي (يسقف) دايماً لكلامي وباكون وياه
ف الشلة اللي اتلمت تهتف عمياني وماشية على هواه
حافضل أوافق على أفكاره وعمري ما حانطق كلمة (لا)
على أي كلام يطلع منه ومضيت عقد وعهد معاه
أما اللي خالفني ولو مرة باكره اشوف شكله وبانساه
مش طايق اسمع له ولا مداخلة... باستحقره لله ف لله
وحالفق له مصيبة وتهمة ف أقرب فرصة وتني وراه
علشان يخرس ويكون عبرة... للي عارضني وعدى مداه
انا أستاذ أفكار وكلامي اللي حايمشي وما حايمشي سواه
واللي باخالفه حايطلع بره... حتى ولو ملايين عاوزاه
والتصويت لو طلَّع رأي ماخادش برأيي ولا اتبناه
موش راح أكمل خليها تولع بلا حوارات بلا شغل حواة
ربنا يستر ع المستقبل... مصر بتصرخ... آه يا ولداه
لو كلنا رافعين كرابيجنا في الحوارات حاتصير مأساة
وساعتها حانندم على كونا ما قتديناش برسول الله
اللي سمع من كل الدنيا واحترم اللي اختلفوا معاه.