يا سيدة

إذا كتبتك شعر غنت قوافيه
وإذا تذكرتك تخيّل من الشوق
اردد اسمك في قصيدي وأغنيه
واشعر بروحك ساكنه كل طاروق
اعتق ألفاظ الشعر لك وأخليه
في مستوى هالة حضورك من الذوق
اعرف مزاجك في الشعر ما بيرضيه
إلا غزل ماقيل قبلك لمخلوق
يا سيدة قافي وروعة معانية
شعري وعطرك والمساء وأعذب الشوق
تعانقت واختال ليل الشتاء... تيه
وأشعل قناديل الفرح رعد وابروق
تعالي شوفي الليل طربى مساريه
شوفي المشاعر جوها مرتفع فوق
هذا الشتاء قدم لنا أحلى لياليه
برد ومطر وإحساس عاشق لمعشوق
تعالي كل واحد يسولف بماضية
عمر الطفولة قبل ما نعرف السوق
الطين والبيت الشعر والمداريه
والوادي والسدرة وقمرية الطوق
تعالي نخرج في المطر ننتظر ليه
عيشي المشاعر باقي العمر ملحوق