احب كل الناس

قلبي جبرته يروي احساسه الود
يبني من الاخلاق عالي المباني
وماشيل في قلبي ولا أعرف الحقد
واحب كل الناس قاصي وداني
مجبول فكري ينسقي صافي العد
ويزرع مع الايام طيب المعاني
واقدام رجلي بالردى مالها مد
أثنيتها من قبل عن كل عاني
وارفع مقامي عن كثيرات تنعد
وفي حكيها ممنوع حتى لساني
ولا ني من اللي لا قسى الوقت ينرد
أجبر بطيبي معثرات الزماني
وباخذ نصيبي من زماني على قد
ما قدّر الله وبالقناعه هباني
وباوفي مع الوافي ولا يلحقه صد
اوفيه لو حتّى زماني عصاني
ومن هو تجمّل بالجمايل لقي رد
ما أنساه ولو عسر الظروف اتحداني
أشكرك يارب(ن)عظيم(ن) بلا حد
من كل نعمه خالقي قد عطاني