(حديث أغراب)

الليلة المنفى جناح غراب=والحزن يسرجني على خيوله
الضيقة أحيانا بدون اسباب=تاخذ بصدري صولة وجولة
طال السفر يا سكة الغياب=ماعادت الأرياق مبلولة
ليل الشتاء قاسي وصبري ذاب=كن الثواني فيه مشلولة
سمّرت نظراتي بثقب الباب=يمكن يلوح الحلم وآطوله
يشق نوره في ظلامي ناب=وابني بصدري للأمل دوله
بعض الهقاوي مالها محراب=حلوة ولكن غير مقبولة
العذر لو يشفع لمن هو غاب=نوافذ الشرهات مقفولة
ياصاحبي صوتك (حديث اغراب)=ياقصر همساته ويا طوله
مبحوح لكن يسرق الألباب=بإحساسه الصادق ومدلوله
طيّر من أغصان القصيد أسراب=لو كانت الاحلام مقتولة
وانسج من خيوط السحاب ثياب=يشبهك هتانه وهملولة
مادام عزمك باقي ٍ ماشاب=الغرس مايخذلك محصوله
بس انت كافح وافعل الأسباب=يجيك يوم وتربح الجولة
يعني لاتحزن والحياة كتاب=لابد ما تتعاقب فصوله