ساهر الليل

الله يهني ساهر الليل بالليل
ان كان جوه فيه جوٍّ خيالي
ياليل انا ماعاد لي بك تعاليل
وش لي بليلٍ ساهرٍ به لحالي
امن اوّلٍ كان اللقاء يشبه السيل
يروي ظما الخافق وله طعم حالي
واليوم زادت عتمة الليل بالحيل
وزاد الظما ومؤشر الضيق عالي
وين انت ياللي تنور الليل وتزيل
ذاك السواد اللي تعدا احتمالي
مد الوصل ومن الغلا زود الكيل
خل الليالي فيك ماهي ليالي
فيها اغني لك من الشعر واشيل
لحنٍ يترجم حالي بشوف غالي
عقب الظما كني على طارف النيل
وعقب المرار اشربك عذبٍ زلالي
ويزين فيك الليل واسهر بك الليل
ويصير جوي فيك جوٍّ خيالي